ARCHIACOLUTHUS vel ARCHIACOLYTHUS

ARCHIACOLUTHUS vel ARCHIACOLYTHUS

Acoluthorum caput. Luithprandus Hist. l. 6. c. 6. Stephanus Archiacoluthus, cum omnibus Acoluthis ac regionariis. Cum enim in Ecclesiis Cathedralibus olim quatuor essent Canonicorum ordines, Presbyterorum scil. Diaconorum, Subdiaconorum et Acolythorum; quilibet horum suis capitibus suberant, Presbyteri Archipresbyteris, Diaconi Archidiaconis, etc. Hodieque Archiacolythorum nomen in Ecclesia Capuana durare, observat Michael Mon. in Sanctuario Capuano p. 576. sed illos cum Acolythis nullum neque in Choro, neque in Capitulo ordinem facere, omnesque pro libitu posse amoveri, addit: olim vero ad eum in Festo Innocentium officium ordinare spectâsse, Dominic. Macer ait in Hierolex. Meminit Benno Cardinalis Archiacolythi Ecclesiae Romanae.